СИМПТОМИ ПРИ НЕДОСТИГ НА ВИТАМИН Б-12

Недостигот на витамин Б12 настанува кога телото не добива доволно или не може да го апсорбира количеството витамин кое му е неопходно.

Многу лица над 50 години ја губат способноста да го апсорбираат витаминот Б12 од храната и се препорачува да го внесуваат преку суплементи.

Во ризичните групи спаѓаат и лицата кои следат строга вегетаријанска исхрана, затоа што најдобар извор на Б12 е токму месото.

Особено голем е ризикот кај веганите кои воопшто не консумираат продукти од животинско потекло.

Бебињата чии мајки се вегетаријанци можно е да страдаат од дефицит на витамин Б12.

Алкохоличарите исто така се ризична група и треба да внимаваат на внесеното количество витамин Б12.

Недостигот на витамин Б12 не е честа појава.

Се развива бавно, па симптомите постепено го зголемуваат интензитетот.

Кога во телото има сериозен недостиг на витамин Б12, некои од симптомите се:

•        Слабост, замор, недостиг на енергија или вртоглавица;
•             Дијареја и запек;
•        Инконтиненција; 
•            Проблеми со концентрацијата;
•            Забрзан срцев ритам и забрзано дишење;
•            Воспален јазик или крварење на непцата;
•            Бледа и жолтеникава кожа.

Ако оваа состојба не се лекува, долготрајниот недостиг на витамин Б12 може да доведе до оштетување на нервните клетки и да предизвика симптоми како:

•   Депресија;
•    Халуцинации;
•  Губење на рамнотежа;
•    Конфузност и сериозни проблеми со помнењето;
•    Вкочанетост или трнење на рацете и нозете.